Hierscht (2)
Et drëpst dem Hierscht
aus der Maul
op de Wues
vun der Nues
an all Kaul
vun der Heck
op all Blat
dat um Pad
nieft dem Stéck
wieleg läit
vun dem Wand
an de Sand
duergehäit
't ass muer gro
faul an dënn
a geschwënn
net méi do -
wéi net gewiescht
Et gäert
Et brennt a ville Länner wierklech schlëmm,
bal hei bal do gëtt Krich erkläert.
't ass Sträit am Hell'ge Land a ronderëm,
et mengt ee bal: d'ganz Welt déi gäert!
------------------------------------
Ech wor emol bei engem Brenner,
do stoungen d'Bidden an der Rei.
Ech si vum Schnaps e schlechte Kenner
a frot de Mann: "Wat dauscht dann hei?"
Hie sot: "'t ass d'Uebst a menge Fässer,
dat ass ewell um Hiewen drun.
Klammt op, dann héiert der nach besser,
gitt kuckt iech d'Saach 'mol richteg un!"
Ech sinn op d'Träppchen du geklommen
an hunn an d'Bidd eragesinn.
Oh mei! Ass do e Knascht geschwommen!
Konnt dat dann eppes Guddes ginn?
"Sou ass dat ëmmer bei dem Hiewen",
huet dunn de Brenner mir erkläert.
"'t ass bal genee ewéi am Liewen:
den Dreck kënnt uewen, wann et gäert!"
---------------------------------
D'ganz Welt, déi hieft, wéi 't schéint,
bal hei, bal do gëtt Krich erkläert.
Da geet et wéi de Brenner mengt:
den Dreck kënnt uewen, wann et gäert!
De Villchen
Mir ass dëslescht beim Trëpplegon
e klenge Villchen opgefall.
Hien hat souvill, souvill ze son,
et huet geschaalt bis an den Dall!
Ech stoung wéilaang verwonnert do,
an 't huet him guer näischt ausgemaach.
Säi freedegt Lidd goung mir sou no,
ech gouf et net méi lass deen Dag.
Deen aneren Dag goung ech 'rëm hin,
de Villche wor schonn nees am gaang.
En huet e Lidd zum Beschte ginn -
mäin Häerz, dat wor ewéi gefaang!
Ech wousst: hie séngt fir mech eleng,
well ech seng Sprooch sou gutt verstinn,
eng Sprooch, mat Téin sou reng,
wéi schéiner et se net ka ginn.
Haut wor mäi Villchen net méi do,
seng Plaz wor eidel, d'Loft wor frësch.
Säi Feele goung mer richteg no -
et ass 'lo roueg bei dem Bësch.
De Villchen ass der Sonn nogaang,
dach bannendra seet mir eng Stëmm:
Jo deen, un deems de sou gehaang,
dee kënnt bestëmmt fir dech erëm!
(vertount vum Luc
R.)
Gedéiesch
Eng Méck
läit um Réck
a struewelt mat de Been -
mä 't hëlleft keen!
Eng Kaz
kënnt op d'Plaz
streckt hire Schwanz an d'Lut -
en Auto tut!
En Hond
hält de Mond
en huet genuch gebillt -
'lo gëtt gespillt!
E Päerd
leeft alläert
hénkelt vun Zäit zu Zäit -
a spréngt ganz wäit!
Eng Kou
huet hir Rou
knat a muelt gedëlleg -
gëtt gutt Mëllech!
Eng Bei
brommt elei
flitt bei d'Blumme richen -
Hunneg sichen!
E Giss
an der Wiss
wullt mat der Maul am Dreck -
oh wat e Geck!